Unglingsdrengur ætlaði að ræna farþegaflugvél

Bandarísk yfirvöld hafa ákært unglingsdreng sem segist hafa áformað að ræna farþegaflugvél sem hluta af sjálfsmorðstilraun. Drengurinn sem er 16 ára var handtekinn af flugvallalögreglu í Nashville í Tennessee á þriðjudagskvöld eftir að flug frá Los Angeles.

Hann mun hafa ætlað að ræna Southwest Airlines flugvélinni og fremja sjálfsmorð samkvæmt George Bolds talsmanni FBI í Memphis; „Hann gaf í skyn að hann ætlaði að deyja í Louisiana. Hann mun hafa átt miða þangað."

Unglingurinn ætlaði að fljúga vélinni á tónleikahöll í Lafayette í Louisiana í miðjum Hanna Montana tónleikum sem fara fram í kvöld.

Handjárn, límband og reipi fundust í fórum drengsins samkvæmt upplýsingum FBI. Hann hefur verið ákærður fyrir tilraun til hryðjuverka og er í haldi í Davidson ríkisfangelsinu fyrir unglinga.

Talsmaður flugfélagsins sagði að engin hætta hefði skapast í fluginu og engar hótanir hefðu komið fram. Ekki er ljóst hvernig lögreglan komst á snoðir um fyrirætlanir piltsins.

Hanna Montana er þáttur á Disney stöðinni. Í henni leikur Miley Cyrus, 15 ára, og pabbi hennar Billy Ray Cyrus sem er kántrísöngvari. Þar segir frá unglingsstelpu sem er dæmigerður gagnfræðanemandi á daginn, en er leynileg dægurlagastjarna á kvöldin.