Garðar stendur við rauðu spjöldin (myndband)

Garðar Örn Hinriksson sagði í samtali við Vísi að hann standi við alla sína dóma í leiknum í gær, þar á meðal bæði rauðu spjöldin sem hann gaf leikmönnum ÍA.

„Ég stend við þetta allt saman," sagði Garðar. „Ég er búinn að skoða þetta í sjónvarpi og myndi engu breyta."

Í myndbrotinu sem fylgir þessari frétt má sjá bæði brotin sem leiddu til þess að Vjekoslav Svadumovic og Bjarni Guðjónsson fengu að líta rauða spjaldið.

Garðar staðfesti að Svadumovic hafi fyrst fengið áminningu fyrir að brjóta á Stefáni Loga Magnússyni, markverði KR. Hann hafi svo fengið aðra áminningu fyrir mótmæli og þar með rautt spjald.

Bjarni Guðjónsson fékk fyrra gula spjaldið sitt fyrir mótmæli eftir að KR skoraði síðara mark sitt í leiknum. Það síðara má sjá á myndskeiðinu. Garðar dæmdi hann brotlegan fyrir peysutog í viðskiptum sínum við Viktor Bjarka Arnarsson.