Redknapp hefur trú á sínum mönnum

Harry Redknapp, nýráðinn stjóri Tottenham, segir efniviðinn í liðinu nógu góðan til að sleppa við fall í ensku úrvalsdeildinni þó liðið hafi aðeins fengið tvö stig úr fyrstu átta leikjum sínum í deildinni.

Atburðarásin á White Hart Lane var mjög hröð um helgina og gengið var frá ráðningu Redknapp nokkrum klukkustundum eftir að Spánverjinn Juande Ramos var látinn taka pokann sinn ásamt fleirum úr þjálfarateyminu.

Redknapp beið ekki boðanna og skellti sér strax niður á hliðarlínu og sá lið sitt vinna 2-0 sigur á Bolton í gær - fyrsta sigurinn í deildinni í vetur.

Stjórinn var hress í viðtölum eftir leikinn í gær og hefur trú á að jafn sterkur leikmannahópur og Tottenham hefur yfir að ráða nái að bjarga sér frá falli.

"Ég hef tekið við klúbbum áður þar sem ég hef hugsað "hvernig á ég að koma okkur úr þessari klípu" eftir að hafa horft á fyrsta leikinn. En öðru gildir um mannskapinn hérna. Hér eru landsliðsmenn í hverri stöðu og það er ótrúlegt hve illa liðið hefur byrjað - það á ekki að vera á botninum," sagði Redknapp.