Heyrir Nýja bandalagið sögunni til?

Það ræðst í dag eða á morgun hvort hinn nýstofnaði stjórnmálaflokkur í Danmmörku, Nýja bandalagið, leggur upp laupana en mjög hefur sigið á ógæfuhliðina á þeim bænum síðustu daga og vikur.

Fyrrverandi þingmaður róttækra vinstrimanna, Naser Khader, stofnaði flokkinn í fyrrasumar og hlaut í byrjun byr undir báða vængi. Benti ýmislegt til að flokkurinn yrði í oddaaðstöðu fyrir þingkosningar sem fóru fram í Danmörku um miðjan nóvember en nokkuð fjaraði undan stuðningi við hann á kjördag.

Flokkurinn fékk fimm þingmenn en nú hafa tveir þeirra yfirgefið hann og þá mælist fylgi hans ákaflega lítið í skoðanakönnunum. Forystumenn flokksins báðu um andrými til þess að íhuga stöðu hans og rennur frestur þeirra út í dag. Svo virðist sem flokksforystan hyggist nýta allan daginn til að íhuga málið því fram kemur á vef Jótlandspótsins að líklega verði ekki tilkynnt fyrr en á morgun hvað verður um flokkinn.