Berjast um ofurkjörmenn Demókrata

Barack Obama og Hillary Clinton takast nú á um stuðning svokallaðra ofurkjörmanna innan Demókrataflokksins. Kosningakerfi flokksins er afar flókið og stuðningur þeirra gæti skipt sköpum.

Ofurkjörmenn eru ekki valdir á flokksþingum í hverju ríki, heldur teljast þeir ofurkjörmenn eingöngu vegna stöðu sinnar sem fyrrum, eða núverandi embættismenn á vegum flokksins. Þeim er frjálst að styðja þann frambjóðanda sem þeir vilja.

Obama hefur stuðning fleiri kjörmanna en Clinton fleiri ofurkjörmanna. Það er því afar mjótt á mununum og talið ólíklegt að annað þeirra nái stuðningi nægilega margra kjörmanna til að úrslitin ráðist fyrir flokksþingið í ágúst.

Það sem flækir hlutina enn frekar er að stuðningur kjörmanna endurspeglar ekki atkvæði í kosningum. Í forkosningunum í Nevada sem dæmi vann Clinton með sex stigum, en Obama fékk einum fleiri kjörmenn vegna þeirrar aðferðar sem ríkið notar við að tilnefna kjörmenn.

Obama er spáð sigri í Wisconsin, Washingtonríki og Hawaii í þessari viku. Clinton horfir hins vegar til kosninga í Texas og Ohio 4. mars í von um sigur þar. Það gæti hjálpað henni að vinna upp forskot að nýju. Hún vonast einnig eftir sigri í Pensilvaníu í apríl.

Howard Wolfson upplýsingafulltrúi Clinton sagði á CNN að erfitt væri fyrir demókrata að kjósa þar sem frambjóðendurnir tveir væru sterkir með breiða stefnuskrá.

Nú eru menn einnig farnir að spá um hvernig frambjóðendunum myndi ganga hreppi þeir tilnefningu síns flokks. Kjósendur í Ohio eru samkvæmt könnuninni líklegri til þess að kjósa McCain umfram Obama og Hillary.

Í Pennsylvaníu snýst dæmið hins vegar við og í því ríki myndu bæði Obama og Hillary hafa betur gegn McCain.

Clinton er nú komin með 1.220 kjörmenn samkvæmt heimildum BBC en Obama er kominn fram úr henni með 1.275 kjörmenn.

John McCain hefur hins vegar tryggt sér 843 kjörmenn en Mike Huckabee 280.