Gerði grín að enska landsliðinu

David Rodrigo, landsliðsþjálfari Andorra, skaut föstum skotum að enska landsliðinu og Fabio Capello þjálfara eftir leik liðanna í undankeppni HM í gær.

Enska liðið vann afar ósannfærandi 2-0 sigur í leiknum og hefði líklega verið niðurlægt ef ekki hefði verið fyrir tvö mörk frá varamanninum Joe Cole í síðari hálfleik.

Leikurinn var um margt líkur viðureign liðanna árið áður þegar enska liðið vann 3-0 með mörkum í síðari hálfleik, en þótti afar ósannfærandi.

Fabio Capello tuðaði yfir einbeittum og stífum varnarleik Andorra eftir leikinn, en þjálfari Andorra bauð honum að skipta við sig um sæti og sjá hvernig færi.

"Herra Capello sagðist ekki skilja af hverju lið eins og Andorra pakkaði í vörn þó það væri að tapa 2-0. Mig langar að bjóða Capello að þjálfa Andorra og ég skal þjálfa enska liðið - ég er nokkuð viss um að ég gæti unnið Andorra stærra en 2-0," sagði Rodrigo.

"Ég sá að ensku leikmennirnir voru að gera grín að mótherjum sínum og þeirri staðreynd að þeir eru margir áhugamenn í knattspyrnu, en þessir sömu 11 leikmenn voru baulaðir af velli af sínum eigin stuðningsmönnum - rétt eins og þegar liðin mættust síðast. Hvað segir það okkur? Ég held að það þýði að um leið og Andorra getur teflt fram 11 atvinnumönnum - muni það vinna Englendinga," sagði þjálfarinn.

Hann sagðist stoltur af frammistöðu sinna manna í leiknum og bætti þvi við að hann reiknaði með að Króatar færu með sigur af hólmi í riðlinum og varaði við því að Hvít-Rússar gætu orðið hættulegir í riðlakeppninni.