Tekst Redknapp hið ómögulega?

Annað kvöld tekst Harry Redknapp á við verkefni sem fimm forverar hans í stjórastól Tottenham náðu aldrei að leysa - að vinna Arsenal í ensku úrvalsdeildinni.

Leikurinn á Emirates verður fyrsti alvöru leikur Redknapp við stjórnvölinn, en það var aðstoðarmaður hans Clive Allen sem stillti upp liði Tottenham um síðustu helgi þegar það vann sinn fyrsta sigur í deildinni.

Tottenham hefur ekki unnið granna sína og erkifjendur í Arsenal í síðustu 17 leikjum liðanna í deildinni og síðasti útisigur Tottenham á Arsenal kom í maí árið 1993.

Tottenham hefur unnið Arsenal tvisvar á útivelli á síðustu 25 árum.

Það er kannski kaldhæðnislegt fyrir stuðningsmenn Tottenham að minnast þess að síðasti Tottenham stjórinn sem náði að stýra liðinu til sigurs á Arsenal í úrvalsdeildinni, var fyrrum Arsenal stjórinn og leikmaðurinn George Graham. Það var 2-1 sigur þeirra hvítklæddu árið 1999.