Velkominn til helvítis

Tony Adams, nýráðinn stjóri Portsmouth í ensku úrvalsdeildinni, segir að það hefði verið óðs manns æði að hafna tilboði um að taka við liðinu af Harry Redknapp.

"Þetta er frábært og ég er upp með mér yfir því að vera sýndur þessi heiður," sagði Adams á blaðamannafundi nú áðan.

"Ég hefði verið galinn að hafna þessu tilboði, ég er mjög spenntur og líður eins og séu komin jól. Þetta er samt mikil áhætta, því ég er að feta í stór fótspor," sagði Adams og vísaði til forvera síns Redknapp sem hafði náð góðum árangri með liðið.

"Stundum er erfitt að taka við af svona mönnum. Hann stóð sig mjög vel. Ég hef hinsvegar úr góðum leikmönnum að moða hjá félaginu og ég átti þátt í að fá þá hingað. Ég vildi ekki að einhver annar fengi að stýra liðinu, það hefði verið áfall - og því vil ég þakka stjórninni fyrir að taka áhættu með því að leyfa mér að taka við," sagði Adams.

Velkominn til helvítis

Hann segist hafa ráðfært sig við fyrrum stjóra sinn hjá Arsenal, Arsene Wenger áður en hann tók við.

"Þetta er næsta skref fyrir mig. Ég er tilbúinn. Ég talaði við Arsene og hann bauð mig velkominn til helvítis. Þá spurði ég hann hvort hann væri tilbúinn, því ég ætlaði að láta hann finna fyrir því," sagði Adams í léttum dúr.

Hann var spurður út í þær vangaveltur að Harry Redknapp myndi nú reyna að fiska eitthvað af leikmönnum Portsmouth til sín hjá Tottenham.

"Ég er tilbúinn að slást við hann um þá. Þetta eru góðir leikmenn og það er gott að þeir séu eftirsóttir, en það er undir mér komið að halda í þá," sagði Adams.