SÞ segir allt að 500 þúsund þurfa aðstoð í Kenía vegna átaka

Um 500 þúsund manns þurfa á aðstoð að halda í Kenía vegna átaka sem blossað hafa upp í kjölfar kosninga þar í landi. Þetta er mat Sameinuðu þjóðanna sem hyggjast safna fé á næstu dögum og vikum til þess að aðstoða yfir 250 þúsund mann sem neyðst hafa til að flýja heimili sín vegna átakanna í Kenía.

Þar takast á fylgismenn Kibakis forseta, sem var endurkjörinn í kosningum í lok desember, og stuðingsmenn Raila Odinga sem heldur því fram að brögð hafi verið í tafli í kosningunum. Ekkert þokast í samkomulagsátt í landinu en nú þegar hafa yfir 500 manns látist í átökum.

Sameinuðu þjóðirnar óttast að vannærðum í landinu muni fjölga ört ef ástandið verði áfram óstöðugt í landinu. Nærri eitt af hverjum þremur börnum undir fimm ára aldri þjáðist af vannæringu áður en upp úr sauð í landinu.

Matvælastofnun Sameinuðu þjóðanna hefur þegar dreift mat til ríflega 30 þúsund manna í fátækrahéruðum Naíróbí en þaðan hafa einnig margir þurft að flýja vegna átakanna.