McCain lýsir yfir sigri

John McCain hefur í fyrsta sinn talað um sig sem sigurvegara forkosninga Repúblíkana. „Ég held að við verðum að venjast tilhugsuninni um að við erum forsetaefni Repúblíkanaflokksins til forsetakosninga Bandaríkjanna. Og ég er bara ekki óánægður með það," sagði McCann blaðamönnum þegar niðurstöður voru enn að berast seint í gærkvöldi.

Það sem kom mest á óvart í gær er góð kosning Mike Huckabee sem náði góðum árangri í suðurríkjunum og Vestur-Virginíu. „Svo lengi sem það eru atkvæði, eða kjörmenn til að berjast um, þá verð ég þar," sagði Huckabee. Hann staðfesti við fréttamenn ásetning sinn að halda áfram í baráttunni um tilnefningu flokksins.

Mitt Romney hélt ótrauður áfram eftir niðurstöðurnar og hét því að halda baráttunni áfram. „Eitt er öruggt," sagði hann; „þessi barátta heldur áfram. Ég held að sumir haldi að henni hafi lokið í kvöld, en svo er ekki. Við berjumst áfram."