Rottuplága herjar á fjölskyldur í Helsingör

Fjórar fjölskyldur sem áttu heima í fjölbýlishúsi Í Helsingör í Danmörku hafa enn ekki getað flutt aftur heim til sín eftir að rottuplága kom upp í húsinu í lok síðasta sumars

Meindýraeyðar í borginni hafa lýst ástandinu sem um rottuplágu frá miðöldum væri að ræða. Upphaf plágunnar má rekja til handvammar við lagningu holræsisins að húsinu.

Íbúarnir í íbúðunum fjórum urðu fyrst varir við að rottugangur væri í húsinu í lok ágúst. Hann jókst svo stöðugt eftir því sem leið á veturinn og brátt voru rotturnar farnar að gera sig svo heimakomnar að þær reyndu að stela mat meðan á matmálstímum fjöldskyldnanna stóð.

Meindýraeyðar voru kallaðir til og komust brátt að því að rotturnar höfðu hreiðrað um sig í eldhúsum íbúðanna, baðherbergjum og borðstofum og verið þar lengi. Húsið var dæmt óíbúðarhæft og fjölskyldurnar fluttar á brott í bráðabirgðahúsnæði.

Þær hafa enn ekki getað flutt til síns heima aftur því þurft hefur að endurbyggja húsið svo gott sem frá grunni til að losna við rotturnar. Að sögn meindýraeyða í Helsingör hefur rottum fjölgað mikið í borginni í vetur og er talið að milt veðurfar sé höfuðorsökin.