Ólöf Arnalds með baráttusöng fyrir Náttúru-tónleikana

Hin frábæra tónlistarkona Ólöf Arnalds mun sjá um að halda áhorfendum við efnið milli Sigur Rósar og Bjarkar á Náttúru-stórtónleikunum í Laugardal á laugardag. Sigur Rós eiga að hefja leik klukkan 19 og Björk mun síðan stíga á svið upp úr klukkan 21.

Eins og gefur að skilja er mikið hafurtask sem fylgir þessum tveimur stærstu nöfnum íslensks tónlistarlífs og því mætast nokkrar andstæður í þeim og Ólöfu sem spilar sína lágstemmdu tóna með aðeins einum aðstoðarmanni.

Verður vonandi eins og þægilegir stofutónleikar

Ólöf segir það heiður að fá að troða upp á tónleikunum og hlakkar mikið til. „Mitt markmið er að þjóna þessari uppákomu þannig að biðin milli hljómsveitanna verði ekki dauður punktur," segir Ólöf sem hræðist áskorunina ekki neitt. „Ég veit reyndar ekkert hvað ég er að fara út í, ég hef aldrei spilað fyrir svona fjölda áður. Svo það kemur bara í ljós hvort þetta verði háskaleg upplifun eða eins og á hverjum öðrum stofutónleikum sem ég hef spilað á."

Fólk á að sameinast í hópsöng

Baráttan fyrir verndun náttúru Íslands er að sjálfsögðu Ólöfu mikið hjartansmál . Ætlar hún ekki að láta sitt eftir liggja því Ólöf hefur samið sérstakan baráttusöng sem hún hyggst kyrja á tónleikunum og hvetur hún alla til að syngja með. „Hópsöngur er svo sterkt sameiningarafl, því fólk þarf ekki að vera með sömu skoðanir niður í smáatriði til að syngja saman."

Viðlagið er einfalt og því ættu allir hæglega að geta sungið með Ólöfu. Viðlagið er eftirfarandi: „Af stað, af stað á nýjan stað." Hér með eru allir hvattir til að syngja hástöfum með.

Hægt er nálgast lagið með því að smella hér.