Tottenham greiðir Ramos 350 milljónir króna

Juande Ramos hefur samið um starfslok sín hjá enska úrvalsdeildarfélaginu Tottenham og mun hann fá 1,7 milljón punda eða tæpar 350 milljónir króna samkvæmt starfslokasamningnum.

Ramos átti tvö og hálft ár eftir af samningi sínum við Tottenham og var með 3,5 milljónir punda í árslaun. Samkvæmt því er nokkuð ljóst að félagið slapp ansi vel með þessa greiðslu. Tottenham var í neðsta sæti deildarinnar þegar Ramos var rekinn fyrir tveimur vikum síðan.

Aðstoðarmenn Ramos, þeir Marcos Alvarez og Gus Poyet, sömdu einnig um starfslok þar sem þeir fengu helming árslauna sinna greidd út. Alls kostaði þessi aðgerð því um 2,5 milljónir punda fyrir Tottenham.

Félagið þurfi þó að greiða Portsmouth fimm milljónir fyrir að leysa Harry Redknapp undan samningi. Hér er því um ansi háar upphæðir að ræða en það virðist þegar byrjað að skila sér því Tottenham hefur ekki enn tapað leik síðan að Redknapp tók við.

Ramos hefur helst verið orðaður við Atletico Madrid og Shakhtar Donetsk í Úkraínu síðan hann hætti hjá Tottenham.