Bendtner: Við getum unnið United

Nicklas Bendtner, leikmaður Arsenal, segir að sínir menn geti vel unnið Manchester United um helgina og að félagið eigi líka möguleika á að vinna Englandsmeistaratitilinn.

Arsenal er sem stendur í fjórða sæti deildarinnar, einu stigi á eftir United og sex stigum á eftir Chelsea og Liverpoool.

„Við höfum enn trú á því að við getum unnið titilinn og þannig verður það til loka tímabilsins," sagði Bendtner. „Við erum með ungt lið og getum enn stungið upp í efasemdarmenn."

Toppliðin þrjú í deildinni hafa hvert tapað einum leik en Arsenal hefur nú þegar tapað þremur leikjum, nú síðast fyrir Stoke. Arsenal hefur einnig ekki unnið síðustu þrjá leiki sína í öllum keppnum.

„Við höfum staðið okkur vel gegn stóru liðunum á þessu tímabili. Það verður ekkert öðruvísi á laugardaginn," sagði Bendtner. „Eftir það sem gerðist á móti Tottenham og Stoke getur vel verið að fólk efist um okkur en við erum enn með fullt sjálfstraust. Við getum vel komið okkur aftur á sigurbraut á morgun."

Emmanuel Adebayor er fjarverandi vegna meiðsla og þá er Theo Walcott einnig tæpur. Robin van Persie verður einnig í banni á morgun.