Keane með sín fyrstu úrvalsdeildarmörk í sigri Liverpool

Robbie Keane skoraði tvívegis í 3-0 sigri Liverpool á West Brom í lokaleik dagsins í ensku úrvalsdeildinni. Alvaro Arbeloa bætti þriðja markinu við undir lok leiksins.

Liverpool kom sér þar með á topp ensku úrvalsdeildarinnar en Chelsea getur endurheimt það á morgun með sigri á Blackburn.

Keane skoraði mörk sín á 34. og 43. mínútum leiksins og var svo skipt inn á fyrir Fernando Torres á 73. mínútu sem lék þar með sinn fyrsta leik með Liverpool síðan hann meiddist í upphafi síðasta mánaðar.

Þetta voru fyrstu úrvalsdeildarmörk Keane með Liverpool en hann kom til félagsins í sumar frá Tottenham.

Fyrra markið skoraði hann eftir sendingu Steven Gerrard og lyfti hann boltanum yfir Scott Carson, markvörð West Brom.

Síðara mark kom eftir skyndisókn Liverpool. Fabio Aurelio átti langa sendingu fram völlinn og náði Keane til boltans á undan Carson sem kom hlaupandi út úr markinu. Keane lék á Carson og sendi boltann í autt markið.