Chelsea aftur á toppinn

Chelsea endurheimti í dag toppsæti ensku úrvalsdeildarinnar með 2-0 sigri á Blackburn þar sem Nicolas Anelka skoraði bæði mörk Chelsea.

Liverpool komst á toppinn í dag en Chelsea jafnaði liðið aftur að stigum í dag og er með betra markahlutfall.

Mikil rigning var á Ewood Park í dag og völlurinn afar blautur. Chelsea var engu að síður betri aðilinn og verðskuldaði að komast yfir, þó svo að nokkur heppnisstimpill hafi verið á fyrra marki Anelka.

Jose Bosingwa átti skot að marki Blackburn á 39. mínútu sem breytti um stefnu á Anelka og hafnaði í netinu. Paul Robinson, markvörður Blackburn, hefði getað náð til knattarins þar sem hann rann fremur hægt eftir rennvotum vellinum en ákvað frekar að mótmæla dómgæslunni áður en boltinn fór yfir línuna. Taldi hann að boltinn hafi farið í höndina á Anelka.

Anelka innsiglaði svo sigurinn þegar 22 mínútur voru til leiksloka. Frank Lampard kom boltanum á Anelka inn í teignum sem vippaði laglega yfir Robinson sem kom hlaupandi út úr markinu.