„Ég hafði mikla trú á Heath Ledger“

Krufning á líki leikarans Heath Ledger leiddi orsök fráfalls hans ekki í ljós. Fleiri próf þarf að framkvæma og niðurstöðu er ekki að vænta fyrr en eftir tíu daga.

Lögreglan hefur sagt að svefnlyf og pillur hafi fundist í íbúð hans þar sem hann fannst látinn en svo virðist sem þær hafi enn verið í glösunum. Einnig hefur verið leitt að því líkur að hann hafi tekið of stóran skammt af eiturlyfjum fyrir slysni.

Fjölskylda leikarans telur ólíklegt að hann hafi framið sjálfsmorð vegna þunglyndis, hann hafi verið lífsglaður og lítið sem ekkert amað að honum.

Aðdáendur leikarans lögðu blóm og kerti við dyr íbúðar hans á Manhattan í New York í gær. Ledger er talin hafa verið mjög hugaður leikari ekki síst í ljósi þess að hann tók að sér umdeilt hlutverk í stórmyndinni Brokeback Mountain.

Leikstjóri þeirra myndar Ang Lee hefur kallað dauða leikarans “hræðilegan enda á frábærum ferli og lífi leikarans.”

“Ég hafði mikla trú á honum,” sagði Mel Gibson sem lék föður hans í kvikmyndinni Patriot. “Hann var rétt að byrja og að týna lífi sínu svona snemma er mikill missir,” sagði leikarinn í yfirlýsingu vegna fráfallsins.