Daily Show segir Íslandi að kenna að ekkert gengur í Írak

The Daily Show er með það á hreinu hvers vegna stríðið í Írak hefur ekki verið unnið. Í þætti sem sýndur var á Comedy Central í gær fer fréttamaður þáttarins, Jason Jones út af örkinni til að kanna hversvegna stríðsreksturinn tekur jafn langan tíma og raun ber vitni. Og kemst að niðurstöðu.

Jú, Ísland, ein mikilvægasta þjóðin á lista hinna staðföstu hafði dregið her sinn heim frá Írak. Jones drífur sig því til Íslands til að sannfæra þjóðina að senda herinn til baka. Þegar fréttamaðurinn kemst að því að „herinn" samanstóð af Herdísi Sigurgrímsdóttur einni ákveður hann að finna hana.

Meðal þeirra sem hann ræðir við í þættinum eru friðarsinninn Stefán Pálsson og Magnús Ver Magnússon. Vísir hefur fyrir því heimilidir að reynt hafi verið að fá viðtal við þungavigtarmenn í íslenskri pólitík, en þeir komið sér fimlega undan því.

Hægt er að horfa á brotið á vef Comedy Central. Seinni hluti þáttarins verður sýndur í kvöld.