Tæplega 1.000 rangar yfirlýsingar um ógnina frá Írak

George Bush forseti Bandaríkjanna og nánustu samstarfsmenn hans gáfu út tæplega eitt þúsund ósannar yfirlýsingar um hættuna sem stafaði af Írak eftir 11. September árið 2001.

Yfirlýsingar þessar voru gefnar á því tveggja ára tímabili sem leið frá árásinni á World Trade turnanna og þar til stríðið í Írak hófst árið 2003. Þetta kemur fram í rannsókn sem gerð var af tveimur óháðum blaðamannasamtökum the Center for Public Integrity og the Fund for Independence in Journalism.

Fram kemur að auk Bush voru það einkum varaforseti hans Dick Cheney, Colin Powell fyrrum utanríkisráðherra og Condolezza Rice þáverandi formaður þjóðaröryggisráðsins sem voru iðin við að gefa út yfirlýsingar um hættuna af Írak án þess að fótur væri fyrir því sem þau voru að segja.