Keane kallar varaforseta FIFA trúð

Roy Keane, knattspyrnustjóri Suderland, er allt annað en sáttur við ummæli Jack Warner, varaforseta alþjóða knattspyrnusambandsins. Warner sagði Keane sýna smærri þjóðum vanvirðingu og svaraði Keane með þeim orðum að Warner væri trúður.

Deilurnar eru vegna sóknarmannsins Dwight Yorke sem kallaður var í landsliðsverkefni hjá Trinidad og Tóbago í miðri viku. Keane bannaði Yorke hinsvegar að taka þátt í verkefninu.

Warner ákvað í kjölfarið að senda opið bréf til fjölmiðla þar sem hann sagði Keane greinilega líta niður á smærri þjóðir og sýna þeim vanvirðingu. Keane þverneitar fyrir þetta. „Ég hef sagt Jack mína skoðun á honum. Hann er trúður," sagði Keane.

Yorke sagði í viðtali að hann væri milli steins og sleggju vegna deilna knattspyrnusambands Trinidad og Tóbago við stjórn Sunderland. „Yorke var að koma úr meiðslumn og hefur aðeins leikinn einn leik með varaliðinu. Hann er ekki kominn í fullt leikform, er 36 ára og getur ekki leikið tvo leiki á einni viku," sagði Keane.

„Ég er stoltur þegar mínir leikmenn spila landsleiki fyrir sína þjóð. Ég er ekki eins og margir aðrir stjórar sem fara í einhverja sandkassaleiki. Staðreyndin er bara sú að Yorke er ekki fullkomlega klár í slaginn og hefur þar að auki sagst vera búinn að leggja landsliðsskónum á hilluna."

„Hr. Warner kemur með þessar hótanir gegnum fjölmiðla og þykist hafa leikmennina í huga en það er ekki satt. Ég ætla að skrifa bréf til Jack en það fer ekki til fjölmiðla eins og hann gerði. Ef þessi maður er varaforseti FIFA, má þá guð hjálpa okkur öllum," sagði Keane.