Berbatov stefnir á að vera bestur

„Ég stefni á að vinna gullknött Evrópu áður en ferlinum lýkur. Þegar ég set mér eitthvað einstaklingsmarkmið þá er ég ákveðinn í að ná því," segir Dimitar Berbatov, nýjasti liðsmaður Manchester United.

Berbatov spilar sinn fyrsta leik fyrir United á morgun þegar liðið heimsækir Liverpool. Hann hefur það orðspor að vera stundum latur en segist ákveðinn í að ná þeim stimpli af sér.

Ryan Giggs segist hafa trú á því að Berbatov verði ein af stærstu stjörnum í sögu félagsins. „Hann er öðruvísi leikmaður en Rooney og Tevez og gefur okkur því nýja möguleika. Ég er viss um að hann geri góða hluti hjá okkur," sagði Giggs.