Tottenham fór illa með Liverpool

Tottenham vann í kvöld 4-2 sigur á Liverpool í ensku deildarbikarkeppninni í knattspyrnu. Alls fóru þrír leikir fram í keppninni í kvöld.

Blackburn vann 2-1 sigur á Sunderland á útivelli en framlengja þurfti leik Chelsea og Burnley þar sem staðan var 1-1 að loknum venjulegum leiktíma.

Tottenham komst í 3-0 á sjö mínútna kafla undir lok fyrri hálfleiks. Lið Liverpool var skipað mörgum leikmönnum sem hafa fá tækifæri fengið í vetur og virtist liðið, sérstaklega í vörn, ná illa saman.

Roman Pavlyuchenko kom Tottenham yfir með skoti úr miðjum vítateignum eftir fyrirgjöf frá vinstri. Þá var komið að Frazier Campbell sem skoraði tvívegis, það fyrra eftir slakt úthlaup Diego Cavalieri, markvörð Liverpool, og það síðara með skalla.

Damien Plessis minnkaði muninn fyrir Liverpool í upphafi síðari hálfleiks en Pavlyuchenko jók muninn á nýjan leik nánast í næstu sókn. Sami Hyypia skoraði svo annað mark Liverpool en þar við sat.

Bæði mörk Liverpool komu eftir nokkuð skrautlega tilburði Heurelho Gomes, markvörð Tottenham, sem þurfti síðar að fara af velli eftir samstuð við Philpp Degen. Gomes virtist vera illa meiddur í andliti.

Roque Santa Cruz kom Blackburn í 2-0 gegn Sunderland í kvöld áður en Kenwyne Jones minnkaði muninn fyrir heimamenn á 71. mínútu.