Þrýst á Prodi að segja af sér

Romano Prodi forsætisráðherra Ítalíu er nú undir þrýstingi að segja af sér embætti. Í kosningu neðri deildar þingsins í gær fékk hann stuðning meirihluta þingmanna. En búist er við að hann tapi kosningunni í efri deildinni seinna í dag.

Lítill hluti samsteypustjórnar Prodi hefur snúist gegn honum og breytt þannig hlutföllum efri deildarinnar sem nú eru stjórnarandstöðunni í vil.

Prodi hittir Giorgio Napolitano forseta í dag. Hann mun hafa beðið Prodi um að forðast seinni kosninguna. Fréttaritari BBC í Róm segir að því sé nú spáð að Prodi muni tilkynna Napolitano afsögn sína eftir ríkisstjórnarfund í dag.

Ákveðið var að kjósa um hvort forsætisráðherrann nyti trausts eftir afsögn dómsmálaráðherrans í síðustu viku. Með honum hvarf meirihluti samsteypustjórnar forsætisráðherrans sem var einungis upp á einn mann. Ástæða afsagnarinnar var sú að dómsmálaráðherrann Clemente Mastella tengdist spillingarmáli sem verið er að rannsaka.