Wenger: Ramos hefði átt að fá meiri tíma

Arsene Wenger stjóri Arsenal vill meina að forráðamenn Tottenham hafi verið full fljótir á sér að reka spænska stjórann Juande Ramos á dögunum.

Arsenal tekur á móti Tottenham í úrvalsdeildinni í kvöld og þar verður Harry Redknapp í fyrsta skipti í stjórastólnum hjá Tottenham.

Wenger segir að það hafi komið sér á óvart hve illa Ramos hafi gengið á White Hart Lane.

"Ég held að hann hefði ekki verið rekinn ef hann hefði komið til félagsins í júlí. Ef það hafði verið raunin hefðu menn kannski verið þolinmóðari við hann. Það getur komið fyrir að menn slaki á eftir að þeir vinna bikar og fari að tapa leikjum. Þetta kom fyrir Ramos og smátt og smátt misstu menn trú á honum," sagði Wenger.

"Það kom mér á óvart að þetta gengi ekki hjá honum því ég hef miklar mætur á honum sem stjóra og manni. Það tekur menn tíma að koma sínum stimpli á liðið og hann hefði þurft meiri tíma. Nú hefur Tottenham farið í allt aðra átt og rekið yfirmann knattspyrnumála af því það virkaði ekki. Aðeins tíminn mun leiða í ljós hvort Redknapp muni ná árangri með liðið."