Lést á fjórhjólinu sem hún fékk í jólagjöf

Sjö ára gömul stelpa í bænum Blackmore á Bretlandi lést í gær eftir að hún varð fyrir Range Rover jeppa þar sem hún keyrði um á fjórhjóli. Hjólið hafði hún fengið í jólagjöf.

Stúlkan sem heitir Elizabeth Cooke var með tíu ára gömlum bróður sínum Jack á fjórhjólinu en þau eltu bíl föður þeirra þegar jeppinn keyrði á þau. Farið var með hana heim og hringt á sjúkrabíl en hún lést síðar á sjúkrahúsinu.

Foreldrarnir höfðu gefið dótturinni hjólið í jólagjöf en lögreglan hefur gefið út að það sé ólöglegt að vera á slíkum hjólum sé maður undir 16 ára aldri. Ökumaður jeppans var 28 ára gömul kona en hún var handtekin í kjölfarið en sleppt gegn tryggingu.

Hjólið sem er 100cc Quadzilla Pro-Shark er sérhannað fyrir börn en kemst á allt að 40 kílómetra hraða.