Ísland mætir Wales í maí

Íslenska landsliðið í knattspyrnu mun leika vináttuleik við Wales miðvikudaginn 28. maí á næsta ári og er þetta sjötti fyrirhugaði æfingaleikur landsliðsins á árinu. Þetta kemur fram á heimasíðu KSÍ í dag.

Fyrirhugaðir eru leikir gegn Armeníu, Hvíta-Rússlandi og Möltu á æfingamóti í febrúar og Færeyjum og Slóvakíu í mars. Svo kemur leikurinn við Wales í maí.

Ísland og Wales hafa sex sinnum mæst í A-landsleik en íslenska liðið hefur aðeins einu sinni náð að sigra, tvisvar hafa þau skilið jöfn og Wales hefur sigrað þrisvar.