Féll fyrir eigin hendi

Matthew Murray, sem skaut fjóra til bana í Colorado fylki í Bandaríkjunum á sunnudaginn, lést af völdum áverka sem hann hlaut þegar hann skaut sjálfan sig í höfuðið. Þetta kom fram við krufningu.

Lögregla skaut Murray fjöldamörgum skotum, en svo skaut hann sjálfan sig og lést af áverkunum. Murray var fyrrum starfsmaður hjá trúboðsskólanum, þar sem hann skaut tvo í höfuðið. Hann keyrði svo að kirkju í nágrenninu og banaði tveimur öðrum.

Murray hafði verið meðlimur í New Life kirkjunni um nokkurt skeið, en hrökklaðist svo úr henni og hafði eftir það haft í hótunum við kirkjuna.