Sagði að Obama vildi tortíma Bandaríkjunum

Judy Rose, sjálfboðaliði úr stuðningsmannaliði Hillary Clinton í Iowa fylki, dró sig til hlés frá kosningabaráttunni eftir að upp komst að hún hefði áframsent fjöldapóst með rógi um Barack Obama. Í póstinum er því haldið fram að Obama sé múslimi sem vilji nýta forsetaembættið til að tortíma Bandaríkjunum. Obama er helsti keppinautur Clinton, í forkosningum demókrata um forsetaembættið, sem fram fara á næsta ári.

Rose sendi tölvupóstinn þann 21. nóvember síðastliðinn. Einn af viðtakendum var starfsmannastjóri Clintons og annar var Gary Hart, starfsmaður Demókrataflokksins í Iowa. Hart er stuðningsmaður Chris Dodd öldungadeildarþingmanns og birti tölvupóstinn á vefsíðunni Daily Kos. Viðbrögð stuðningsmanna Clintons voru þau að biðja Rose um að láta af störfum fyrir framboðið.

Í bréfinu er greint frá því að faðir Obama og stjúpfaðir hafi verið múslimar og að Obama hefði búið í Indonesíu hluta úr bernsku sinni.