Chaves hótar til hægri og vinstri

Hugo Chavez forseti Venesúela segist munu stöðva olíusölu til Bandaríkjanna ef bandarísk stjórnvöld skipta sér af þjóðaratkvæðagreiðslu um nýja stjórnarskrá í Venesúela í dag.

Þá segist hann munu banna starfsemi spænska olíufélagsins Repsol í landinu, komist hægristjórn aftur til valda á Spáni.

Íbúar Venesúela greiða í dag atkvæði um stjórnarskrárbreytingar sem munu, ef þær eru samþykktar, auka mjög völd forseta. Þannig afnema þær takmarkanir á fjölda kjörtímabila sem einn maður getur setið í embætti forseta, flytja stjórn peningamála frá Seðlabankanum til forseta og leyfa honum að takmarka mjög prentfrelsi á neyðartímum.

Almennur vinnutími er styttur úr átta klukkustundum í sex. Chavez segir að atkvæði með breytingunum sé stuðningsyfirlýsing við sig en atkvæði gegn þeim sé stuðningsyfirlýsing við Bush Bandaríkjaforseta.