Meistaradeildarfé greitt til íslenskra félaga

KSÍ hefur nú úthlutað þeim tæpu 20 milljónum sem sambandinu barst frá Knattspyrnusambandi Evrópu vegna tekna Meistaradeildar Evrópu tímabilið 2006-7.

Þar að auki lagði KSÍ til sautján milljónir af eigin rekstrarfé. Öll knattspyrnulið á landinu sem sinna barna- og unglingastarfi fengu greiðslu.

Hingað til hafa tekjur Meistaradeildarinnar aðeins runnið til félaga í efstu deild en með innleiðingu leyfiskerfis í 1. deild karla uppfylltu félög í þeirri deild skilyrði UEFA til að hljóta greiðsluna.

KSÍ ákvað svo að leggja til greiðslur til annarra félaga sem sinna barna- og unglingastarfi en leika ekki í efstu eða næstefstu deild hér á landi.

Félög í Landsbankadeildinni hljóta 1,2 milljónir króna hvert, 1. deildarfélög 800 þúsund krónur og 2. deildarfélög 500 þúsund krónur. Félög í 3. deildinni sem og önnur félög hljóta 400 þúsund krónur hvert.