Danir tóku þátt í tilraunum nasista í Buchenwald

Samstarf Dana við Þjóðverja á tímum nasista og seinni heimstryjaldarinnar var umtalsvert meira en Danir hafa hingað til viljað viðurkenna. Ný bók afhjúpar meðal annars þátttöku Dana í lyfjatilraunum á sígaunum í Buchenwald útrýmingarbúðunum.

Í nýrri bók sem skrifuð er af sagnfræðingnum Henrik Tjörnelund kemur meðal annars fram að Statens Serum Institut eða Lyfjatæknistofnun Danmerkur útvegaði nasistum mótefni við sárasótt sem notað var við tilraunirnar í Buchenwald. Spurningin sé hvort þetta hafi verið gert með vitund og vilja danskra stjórnvalda en skjöl sem gætu varpað ljósi á það eru horfin.

Fram kemur í bók Tjörnelund að árið 1944 hafi sárasóttarmótefnið verið prófað af nasistum í Buchenwald og að stofnunin hafi vonast til að geta selt mótefnið til þýska hersins og Waffen SS ef tilraunirnar lofaðu góðu. Mótefnið var unnið úr músalifur og var prófað á 30 sígaunum í mars 1944. Við tilraunirnar léstust sex þeirra.

Lyfjatilranir nasista á stríðsárunum voru taldar ómannlegar, ollu föngunum í útrýmingarbúðum miklum kvölum og dauða og var þó vart bætandi á illa vist þeirra.

Talsmaður Statens Serum Institut segir að Tjörnelund geri meir úr þessari samvinnu stofnunarinnar og nasista og að stofnun hafi ekki vitað til hvers mótefnið var notað.