Blóðugur slagur fyrir betri tíð

Söngur, dans, fyllerí og slagsmál. Nei, við erum ekki að tala um íslenskt sveitaball - heldur uppskeruhátíðina Tinka.

Í byrjun Maí ár hvert hittast þúsundir Bólivískra frumbyggja í afskekktum þorpum í fjallahéruðum landsins. Þar drekka þeir sig fulla og slást, jarðargyðjunni Bajamama til dýrðar.

Teygjubyssum, kylfum, hnefum og svipum er beitt í slagnum, sem endar iðulega með blóðsúthellingum, og stundum dauða. Samkvæmt þjóðtrúnni er blóðið ávísun á góða uppskeru.

Lögreglan í Machu, einni þeirra borga þar sem hátíðin fer fram, ákvað í ár að skerast í leikinn. Tveir hópar höfðu mælt sér mót þar með það fyrir augum að berjast til dauða. Tugir manna hafa látist á Tinka í borginni undanfarin ár, en mannslátin eru jafnvel talin tryggja enn betri uppskeru en blóðsúthellingar einar saman.

Bólivía er fátækasta land Suður-Ameríku, og byggja frumbyggjarnir afkomu sína að mestu á landbúnaði.

Tinka, sem þýðir fundur á Quechua tungu á sér rúmlega þúsund ára sögu. Mannfræðingar telja að upphaflega hafi hún verið notuð sem leið til að losa um spennu í samskiptum ættbálka. Þá hafi hún veitt skemmtum, á svipaðan hátt og fótboltaleikur eða hnefaleikar gera í dag.