Eiður Smári ekki í hópnum hjá Barcelona

Eiður Smári Guðjohnsen hefur verið skilinn eftir utan leikmannahópsins hjá Barcelona fyrir viðureign liðsins gegn Racing Santander í spænsku úrvalsdeildinni á morgun. Samkvæmt fréttum frá Spáni á Eiður Smári ekki við meiðsli eða veikindi að stríða - hann þarf einfaldlega að víkja fyrir Lionel Messi, sem er aftur orðinn leikfær eftir þriggja mánaða legu á hliðarlínunni vegna meiðsla.

Eiður Smári lék ekki með Barcelona um síðustu helgi vegna mígreniskasts sem hann fékk skömmu fyrir leik, en þá átti íslenski landsliðsfyrirliðinn að vera í byrjunarliðinu. Auk Eiðs Smára er ekkert pláss fyrir Lilian Thuram og Silvinho í hópnum hjá Barcelona.

Af framherjum liðsins er Samuel Eto´o í hópnum ásamt Javier Saviola og Santiago Ezquerro.