Hart deilt í umræðum um forvarnir

Umræða um forvarnarmál á Alþingi varð að heiftúðlegri deilu milli heilbrigðisráðherra annars vegar og þingmanna Framsóknarflokksins og Vinstri - grænna hins vegar.

Það var Bjarni Harðarson, þingmaður Framsóknarflokksins, sem vakti athygli á því að vímuefnavandinn væri dauðans alvara en forvarnadagurinn er í dag. Fagnaði hann auknu fé til forvarna en sagði blikur á lofti, meðal annnars vegna hugmynda um að leyfa bjór- og léttvínssölu í verslunum. Benti hann á að því fyrr sem ungmenni smökkuðu áfengi því meiri líkur væru á því að þau leiddust út í fíkniefnaneyslu. Því væru hugmyndir um að selja bjór og léttvín í matvöruverslunum ekki góð skilaboð.

Guðlaugur Þór Þórðarson heilbrigðisráðherra sagðist hafa unnið að forvarnamálum frá fyrsta degi í embætti og benti á að Íslendingar hefðu náð góðum árangri í forvörnum, svo góðum að aðferðir Íslendinga væru útflutningsvara. Hins vegar þyrfti að skoða breytinguna þegar börn færu frá grunnskólum upp í framhaldsskóla. Sumarið sem það gerðist ykist vímuefnanotkun yfir 100 prósent hjá ungmennum. Þess vegna hefði hann og menntamálaráðherra tekið höndum saman með framhaldsskólanemum um forvarnastarf í skólunum.

Fleir þingmenn tóku til máls og sögðu mikilvægt að vel tækist til í forvarnamálum. Þar þyrftu fjölmargir að koma að, ríki, sveitarfélög, vinnumarkaður og félagasamtök og hreyfingar.

Aumkunarverð málsvörn

Guðlaugur Þór Þórðarson heilbrigðisráðherra sagði svo við lok umferðarinnar að reynt hefði verið að draga sérstaklega fram stuðning hans við áfengisfrumvarpið. Benti hann á að bæði framsóknarmenn og vinstri - grænir hefðu viljað koma áfengi í búðir.

Við það reiddust framsóknarmenn og kvaddi Guðni Ágústsson, formaður Framsóknaflokksins, sér hljóðs undir liðnum fundarstjórn forseta og sakaði heilbrigðisráðherra um að vera ódrengilegur í umræðu. Framsóknarmenn hefðu ekki viljað bera áfengi í búðir heldur væru þeir á móti áfengisfrumvarpinu.

Heilbrigðisráðherra sagði þá að hann væri einungis að vísa til þess að á undanförnum árum hefðu verslanir ÁTVR verið færðar inn í matvöruverslanir og bensínstöðvar, í tíð framsóknarmanna í ríkisstjórn.

Steingrímur J. Sigfússon, formaður Vinstri - grænna, sagði ræðu heilbrigðisráðherra aumkunarverða málsvörn fyrir stuðning ráðherrans við áfengisfrumvarpið. Fram væri kastað órökstuddum og röngum fullyrðingum. Vinstri - græn væru fylgjandi ábyrgri og aðhaldssamri áfengisstefnu og vildu ekki áfengi í búðir. Hins vegar vildi flokkurinn góða þjónustu í verslunum ÁTVR.