Ekki þjóðaratkvæði í Danmörku um nýjan ESB-samning

Ekki verður þjóðaratkvæðagreiðsla í Danmörku um nýjan samning um umbætur á starfi Evrópusambandsins.

Leiðtogar aðildarríkjanna samþykktu samninginn í október en honum er ætlað að koma í stað stjórnarskár ESB sem Hollendingar og Frakkar höfnuðu í þjóðaratkvæðagreiðslu árið 2005.

Á blaðamannafundi í morgun sagði Anders Fogh Rasmussen, forsætisráðherra Danmerkur, að danska þjóðþingið myndi greiða atkvæði um samninginn en talið er að meirihluti sé fyrir því á þingi að staðfesta hann. Með samningnum væri ekki verið að láta af hendi fullveldi Danmerkur og því væri það eðlilegt að þingið greiddi atkvæði um hann en ekki þjóðin.