Stærri og flottari demantar um þessi jól en oft áður

Íslendingar ætla að gefa stærri og flottari demantshringa en áður fyrir þessi jól. Íslenska þjóðin virðist gripin demantsæði og ekki er lengur óalgengt að gefa demantshring í morgungjöf á tyllidögum eða jafnvel bara sem tækifærisgjöf. Demantar eru enda ágætis fjárfesting og þá er ekki verra að sýna aðeins auðinn.

„Við gullsmiðir höfum puttann á púlsinum og erum þeir fyrstu sem finnum fyrir því ef það harðnar á dalnum og svo öfugt," segir Sigurður Steinþórsson hjá Gull & Silfur á Laugaveginum. Hann hyggst panta meira af demöntum fyrir þessi jól en oft áður enda sé mjög mikil sala á þessu eftirsóknaverða djásni um þessar mundir og steinarnir sem fólk vill fá í hringana sína stækka og stækka. Sigurður segir jafnframt að þeir hafi nýlega fengið fyrirspurnir og jafnvel pöntun um að smíða demantshring handa nýfæddum kornabörnum þannig að það eru ekki bara konurnar sem skreyta sig með gimsteininum.

Helga Jónsdóttir í Gullkúnst tekur undir orð Sigurðar og hún telur sig þurfa að vera betur undirbúna fyrir þessi jól. „Ég býst við því að það verði meiri demantssala fyrir þessi jól en oft áður," segir Helga sem nýlega fékk pöntun upp á hálfra milljón króna giftingarhring. „Þetta er alls ekki algengt en vissulega hefur komið fyrir að ég hafi ekki átt nægilega stóra demanta og ég finn fyrir því að fólk vill stærri og stærri demanta," útskýrir Helga og bætir því við að þjóðin virðist jafnframt hafa miklu meira vit á þeim demöntum sem þeir vilja. „Fólk virðist vera aðeins meira upplýst," segir Helga.

Jón Sigurjónsson hjá Jón & Óskari hefur verið að í demantsbransanum í þrjátíu ár og segir að þótt þeir finni kannski ekki fyrir því að meira seljist af demöntum þá finni þeir mikið fyrir því að fólk vilji meiri íburð en áður. „Fólk vill hafa hringana stærri og glæsilegri," segir Jón og sannast þar kannski hið fornkveðna sem Loralei Lee færði í söng að demanturinn væri besti vinur konunnar.

freyrgigja@frettabladid.is