Spila á By:Larm

Söngkonan Lay Low og hljómsveitirnar Reykjavík! og Ultra Mega Technobandið Stefán koma fram á skandinavísku tónlistarráðstefnunni By:Larm sem verður haldin í Noregi 8. til 10. febrúar. Spila þau undir merkjum Iceland Airwaves-hátíðarinnar.

Ráðstefnan dregur árlega til sín hundruð starfsmanna tónlistarbransans á Norðurlöndunum, Bretlandi og annars staðar í Evrópu, auk venjulegra tónlistaráhugamanna. Hátíðin hefur farið fram árlega síðan árið 1998 og fagnar því tíu ára afmæli í ár.

Aðstandendur By:Larm hafa síðustu ár verið fastagestir á Airwaves. Þetta er engu að síður í fyrsta sinn sem hátíðirnar tvær vinna saman með þessum hætti. Aðdragandinn er samstarf Airwaves og norska menntamálaráðuneytisins. Ráðuneytið styrkti tónleika fjögurra norskra hljómsveita á Airwaves í fyrra (120 Days, Skatebård, The Whitest Boy Alive og Datarock) í þeim tilgangi að efla framgang norskrar tónlistar á alþjóðavettvangi. Í kjölfarið fékkst ráðuneytið til að styðja við bakið á sérstakri Airwaves-dagskrá á By:Larm.