Straumur til Eyja

Jú, straumurinn er byrjaður. Það er þegar mikið um brottflutta Eyjamenn sem eru með heimagistingu og ég á von á því að það komi margir gestir með Herjólfi í dag, sagði Tryggvi Már Sæmundsson í Þjóðhátíðarnefnd Vestmannaeyja þegar Fréttablaðið náði af honum tali í gær.

Tryggvi sagði að straumurinn myndi halda áfram að aukast í dag og á morgun þegar sjálft Húkkaraballið er haldið. Þar eru Stuðmenn að spila og ég býst við að það verði allt pakkað, segir Tryggvi Már.

Formleg dagskrá Þjóðhátíðar hefst um miðjan dag á föstudag og hápunktur hátíðarinnar er á sunnudagskvöld þegar Árni Johnsen stjórnar Brekkusöng í Herjólfsdal.