Tískuvika á Íslandi í nóvember

„Já, ég staðfesti það að Iceland Fashion Week mun fara fram hér á landi í byrjun nóvember en öll smáatriði eru í bígerð," segir Rafn Rafnsson, framkvæmdastjóri Base Camp framleiðslufyrirtækisins en þeir hafa tekið yfir uppsetningu tískuvikunnar í samvinnu við Fatahönnunarfélag Íslands.

Ísland er greinilega komið á kortið í tískuheiminum því tískuvikan var nefnd í grein í breska blaðinu Herald Tribune þar sem stiklað var á stóru um tískuvikur heimsins á borð við Paris, London og New York.

Þetta er sjöunda árið sem Iceland Fashion Week fer fram en Kolbrún Aðalsteinsdóttir hefur séð um uppsetningu viðburðarins fram að þessu. Nú er allt í höndunum á Base Camp í samvinnu við fatahönnunarfélagið. „Ég hef ákveðið að fara aftur til fyrri starfa og legg Iceland Fashion Week í hendurnar á þessu góða fólki," segir Kolbrún og segist kveðja stolt viðburðinn sem hún setti á laggirnar og vill þakka öllum þeim sem hafa lagt hendur á plóg til að koma íslensku tískuvikunni á kortið.

Það er vel við hæfi að fatahönnunarfélagið komi við viðburð sem þennan þar sem þetta er mikill stökkpallur út í heim fyrir íslenska fatahönnun. „Það eru allir innan félagsins tilbúnir að leggjast á eitt til að gera tískuvikuna sem glæsilegasta og höfum við alla burði til að hafa flottan tískuviðburð hér á landi. Við erum mjög framarlega á þessu sviði í heiminum," segir Gunnar Hilmarsson formaður fatahönnunarfélagsins en ekki er ennþá búið að festa alla hönnuði sem munu taka þátt.

Erlent innkaupafólk sem og blaðamenn frá stærstu tímaritum heims munu koma hingað til lands í tilefni að tískuvikunni. „Við viljum gera þetta að árlegum viðburði hér á landi. Iceland Fashion Week verður í slagtogi með stærstu tískuvikum heims," segir Gunnar brattur að lokum.