Nördar leika til sigurs

Æði sérstakur knattspyrnuleikur fer fram á Laugardalsvelli í kvöld þegar sjónvarpsliðið KF Nörd tekur á móti Íslandsmeisturum FH klukkan hálf átta. Þegar hafa um sjö þúsund manns tryggt sér miða á leikinn en hann verður síðan sýndur í síðasta þættinum um nirðina sextán sem læra knattspyrnu í fyrsta sinn.

Á blaðamannafundi sem haldin var á Nordica hótel kom fram að liðin ætli að leggja allt í sölurnar fyrir þennan leik og hótaði meðal annars Ólafur Jóhannesson, þjálfari FH, að hætta með liðið ef það tapaði. Hann hyggst jafnframt taka fram takkaskóna á ný eftir nokkurra ára hlé frá knattspyrnuiðkun auk þess sem fyrrum fyrirliði FH-inga og núverandi aðstoðar­þjálfari, Heimir Guðjónsson, ætlar að láta til sín taka á vellinum.

Logi Ólafsson, þjálfari Nörd­anna, sagðist á fundinum finna fyrir mikilli pressu að ná góðum úrslitum enda hefði undirbúningstímabilið ekki gengið sem skyldi. Hann sagðist vera með tvö tromp uppi í erminni sem myndu jafnvel leggja sitt á vogarskálarnar til að leggja Íslandsmeistaranna að velli en vildi ekki gefa upp hverjir það væru.

Nördarnir sjálfir sögðust vera hvergi bangnir enda þekktu þeir lítið til mótherjana.