Sungið fyrir mótatimbri

Helsta markmið sjálfboðaliðasamtakanna Bergmáls er að hlúa að krabbameinssjúkum og öðru langveiku fólki en samtökin hafa um áraraðir boðið fólki til orlofsdvalar að Sólheimum í Grímsnesi. Á morgun verða haldnir styrktartónleikar í Hafnarborg þar sem safnað verður fyrir málefnið og byggingu nýs orlofshúss.

Sigurjón Aðalsteinsson, einn af aðstandendum Bergmáls, útskýrir að félagsskapurinn hafi ekki farið hátt en samtökin hafa vaxið og dafnað vel á þessum tíu árum. Bergmál er vina- og líknarfélag og tekur nú liðlega fimmtíu meðlimi.

"Félagið varð til í tengslum við samnefndan sönghóp en það var stofnað til að heiðra minningu eins félaga hópsins sem dó úr krabbameini. Inn í félagsskapinn kom síðar fólk með gott hjartalag sem kann ekkert endilega mikið að syngja," útskýrir Sigurjón og áréttar að söngurinn sé samt ávallt til staðar.

Meðan á orlofsdvölinni stendur eru haldnar kvöldvökur hvert kvöld þar sem mikið er sungið en þangað koma oft listamenn í heimsókn. Einnig er boðið upp á ýmiskonar afþreyingu og heilsurækt. "Eftirspurnin eykst sífellt en til okkar kemur oft fólk sem er félagslega illa statt og oft utangátta í kerfinu," segir Sigurjón og bætir við að vitaskuld séu allir velkomnir.

Eitthvað fyrir allaÁ tónleikunum annað kvöld syngur óperudívan Halla Margrét Árnadóttir en hún er hér stödd í stuttri sumarheimsókn frá óperulandinu Ítalíu þar sem hún starfar alla jafna. "Ætli það megi ekki segja að ég sé í nokkurs konar orlofsferð á Íslandi," segir Halla Margrét og áréttar mikilvægi þess fyrir alla að skipta um umhverfi. Halla Margrét ætlar að grípa tækifærið og syngja sín uppáhaldslög á tónleikunum en hún hefur lítið komið fram hérlendis á undanförnum árum sökum anna á meginlandinu. "Þetta er eiginlega í fyrsta skipti sem mér gefst færi á að syngja það sem ég hef verið að flytja úti," segir hún og lofar að allir muni fá eitthvað við sitt hæfi. "Ég kem víða við, alveg frá dramatískustu aríum til söngleikjaperla frá Napólí og svo auðvitað uppáhalds íslensku lögin mín eftir Kaldalóns," segir hún sposk. Um næstu helgi mun Halla Margrét síðan syngja fyrir kvöldvökugesti á Sólheimum. Gott liðsinniMeðleikari á tónleikunum verður píanóleikarinn Antonía Hevesi og sérlegur kynnir verður séra Hjálmar Jónsson dómkirkjuprestur. "Það er nefnilega lítið gaman að hlusta á þessar þungu ítölsku aríur þegar maður veit ekkert um hvað er verið að syngja," segir Halla Margrét. "Ég er kannski að geifla mig eitthvað rosalega – er að syngja um að drepa mann og annan og enginn veit neitt um það. Svo kemur fólkið út af tónleikunum og hristir hausinn og veit ekkert hvað var að gerast." Þá er gott að hafa ljúfa leiðsögn gegnum dramatíkina og Halla Margrét segist ekki hafa getað fundið betri mann í það en séra Hjálmar. "Síðan hefur hún Snæbjörg Snæbjarnardóttir verið mér innan handar með íslensku lögin," bætir hún við.

Tónleikarnir fara fram í Hafnarborg kl. 20 annað kvöld og er miðasalan hafin þar og í sérlegum miðasölusíma 825 7957. Sigurjón útskýrir að framkvæmdir við byggingu hússins, sem rísa mun á Sólheimum, muni hefjast í haust en um er að ræða heilsárshús sem líknarfélög geta leigt á kostnaðarverði fyrir skjólstæðinga sína.

"Það verður sumsé sungið fyrir mótatimbrinu," segir hann og kímir. - khh