Skemmtiferðaskipin full af Þjóðverjum

 Í sumar koma tæplega áttatíu skemmtiferðaskip að höfn í Reykjavík, en langflest þeirra skipa sem koma til landsins eiga viðkomu þar. Í fyrra komu um 55.000 manns með skemmtiferðaskipum til landsins og er búist við að talan verði enn hærri í ár.

Ágúst Ágústsson, markaðsstjóri hjá Faxaflóahöfn, segir flesta koma frá Þýskalandi, en í fyrra kom tæplega helmingur allra farþega þaðan. "Ég held að það sé vegna þess að þeir komast hvergi almennilega í sjó í heimalandinu, svo heillar norðrið þá líka mikið. Skipin heimsækja oft Bergen auk Íslands og sigla svo suður norsku strandlengjuna," segir Ágúst um mögulegar ástæður fyrir þessum mikla áhuga Þjóðverja á Íslandi.

Algengt er að skemmtiferðaskipin heimsæki Akureyri, Ísafjörð, Grundarfjörð eða Vestmannaeyjar auk Reykjavíkur. Ekki geta þó allar hafnir tekið við öllum skipum vegna dýptar- og stærðartakmarkana. "Flestir sem koma að bryggju hérna í Reykjavík vilja vera á Hafnarbakkanum, sem næst miðbænum, en þar getum við bara tekið á móti ákveðið löngum skipum. Á fimmtudaginn vorum við að opna nýjan hafnarbakka í Sundahöfn sem nefnist Skarfabakki, þar getum við tekið á móti öllum þeim skipum sem koma í sumar."

Star Princess er fjölmennasta skipið sem kemur til landsins í sumar, en það rúmar um 2.600 manns auk 1.200 manna áhafnar. Það kemur við hér á landi í september á leið sinni frá Evrópu til Ameríku, en farþegarnir eru flestir frá Bandaríkjunum. "Það er ekki óalgengt að það sé einn í áhöfn um hverja tvo farþega á svona lúxusskipum, enda eru þessar ferðir ekki ódýrar," segir Ágúst um áhafnarfjöldann. Dæmi eru um að vikuferð í svítu kosti upp undir milljón.

Öryggi vegna skipakoma var stóraukið í júlí í fyrra þegar hertar reglur um eftirlit og gæslu við hafnir tóku gildi.