Hátæknisjúkrahúsi og Sundabraut frestað?

Fjöldi þingmanna Sjálfstæðis- og Framsóknarflokks er hlynntur því að byggingu hátæknisjúkrahúss og lagningu Sundabrautar verði slegið á frest. Formaður Samfylkingarinnar segir flokkinn tilbúinn til að slást í lið með ríkisstjórninni, vilji hún verja andvirði Símans í að viðhalda stöðugleikanum.

Ríkisstjórnin ákvað í síðustu viku að lækka hámarkslánshlutfall Íbúðalánasjóðs úr 90 prósentum í 80 prósent, og að stöðva öll frekari útboð í vegagerð um óákveðinn tíma. Þetta er gert til að ná niður verðbólgunni, en það er augljóslega að myndast stemmning fyrir því að ganga mun lengra. Einar Oddur Kristjánsson, starfandi formaður fjárlaganefndar, ætlar að beita sér fyrir því að lögum um notkun andvirðis Símans verði breytt og að bæði hátæknisjúkrahúsi og Sundabraut verði frestað.

Fréttastofan ræddi við fjölmarga þingmenn Sjálfstæðisflokks og Framsóknarflokks í dag og allir eru þeir sammála um að stíga verði virkilega fast á bremsuna við gerð fjárlaga í haust. Og það sem meira er langflestir virðast sammála um að vel komi til greina að setja ný lög um hvernig andvirði Símans skuli varið, rétt eins og Einar Oddur hefur lagt til. Allir Sjálfstæðisþingmennirnir sem fréttastofan ræddi við í dag eru opnir fyrir að fresta hátænisjúkrahúsi, en einn lýsti efasemdum um að fresta Sundabraut.

Og Samfylkingin virðist líka tilbúin til að samþykkja frestun þessara mannvirkja í haust. Formaðurinn, Ingibjörg Sólrún Gísladóttir, gagnrýnir að yfir höfuð hafi verið sett lög um notkun Símapeninganna, því að með því hafi ríkisstjórnin bundið hendur sínar og fætur. Ef ríkisstjórnin vilji sýna aðhald við gerð fjárlaganna í haust sé hins vegar sjálfsagt að Samfylkingin taki þátt í því.

Geiningardeildir bankanna virðast líta svo á að þessara aðgerða gerist varla þörf. Framkvæmdir við Sundabraut hefjast í fyrsta lagi í lok árs 2007 og frmkvæmdir við hátæknisjúkrahús ekki fyrr en 2008 eða 2009. Í efnahagshorfum greningardeildar KB Banka frá í gær er því spáð að þegar þarna verði komið sögu verði þenslan að mestu yfirstaðin. Verðbólgan nái hámarki í 9 prósentum á ársfjórðungnum sem nú stendur, en gangi fremur hratt niður frá og með miðju næsta ári. Þá muni fasteignaverð lækka um 2 til 3 prósent á næstu 12 mánuðunum.