Yngsta áhöfnin vann

Fyrsta skútan í siglingarkeppninni „Skippers d'Islande“  kom í höfn  klukkan hálf átta í morgun. Skipstjórinn  var yngsti þátttakandi keppninnar, hin 25 ára gamla Servane Escoffier frá Frakklandi.

Ræst var frá Paimpol Í Frakklandi þann 24. júní og siglt var til Reykjavíkur. Servane Escoffier, sigurvegari keppninar var 5 daga og 13 tíma á leiðinni.

Servane hefur siglt um heimsins höf frá 16 ára aldri og hefur m.a siglt til Brasilíu og karabíska hafsins.

Þetta er í þriðja skiptið sem keppnin er haldin og það er Paimpol bær sem skipuleggur keppnina. Einnig verður siglt til Grundafjarðar sem er vinabær Paimpol.

Keppnin er haldin til minningar um veiðar Frakka við Íslandsstrendur og frönsku sjómennina sem komu svo þúsundum skipti til Íslands mest alla 19. öldina til þorskveiða.

Með í för eru þrír félagar Servane en saman skipa þau yngstu áhöfnina í keppninni en meðaldur þeirra er undir 25 ára. Aðspurð að því hvað þau dundi sér við á kvöldin, segjast þau einungis hafa áhuga á falla í djúpan svefn eftir erfiðan dag upp á þilfari.