Formaður félags smábátaeiganda á norðanverðum Vestfjörðum vill að verði teknar upp nýjar aðferðir við ákvarðanir á afla. Menn séu orðnir hundleiðir á skerðingum yfirvalda.
Í samtali við Bæjarins Besta á Vestjörðum segir Gunnlaugur Finnbogason formaður Eldingar, að mönnum þyki ráð að prófa nýjar aðferðir við stofnmælingar sem liggja til grundvallar ákvörðunum um heimildir til veiða. Skerðingar hafi mælst mjög illa fyrir meðal smábátaeiganda. Í framhaldi af nýrri reglugerð um leyfilegt aflahámark segir Gunnlaugur að réttast sé að gefa Hafrannsóknastofnun frí í nokkur ár og styðjast í staðinn við kenningar sumra fiskifræðinga um að þörf sé á grisjun. Bæjarins Besta bendir á að Jón Kristjánsson fiskifræðingur telji vera of mikið af fiski í sjónum sem keppir um takmarkað fæðuframboð.
