Of margir nota ekki belti

Það að farþegi í aftursæti notaði ekki bílbelti er talið hafa átt þátt í að tveir biðu bana í bílslysi á síðasta ári að mati Rannsóknarnefndar umferðarslysa. Aðalvarðstjóri hjá Lögreglunni í Reykjavík segir lögreglumenn um allt land daglega sjá mikilvægi bílbeltanotkunar.

Af þeim sem fórust í umferðaslysum í fyrra notuðu 73 prósent bílbelti en 27 prósent notuðu ekki bílbelti. Er þetta mun hærra hlutfall en fjöldi þeirra sem almennt nota ekki bílbelti. Rannsóknarnefndin telur að þrír hefðu lifað af slysin hefðu þeir notað bílbelti. Í einu tilviki kastaðist bílbeltalaus farþegi í aftursæti á farþega í framsæti, sem notaði bílbelti, líklega með þeim afleiðingum að báðir fórust að mati nefndarinnar.

Árni Þór Sigmundsson segir bílinn sem fjórmenningarnir voru í hafa verið á lítilli ferð þannig að ef bílbelti hefðu verið notuð hefðu allir átt að sleppa lítið slasaðir úr slysinu.

Ökumaður kastaðist úr bíl sínum þegar árekstur tveggja bíla varð á Vesturlandsvegi um kvöldmatarleytið í gærkvöldi. Sá er ekki talin hafa verið í bílbelti. Tvær stúlkur sem slösuðust alvarlega í umferðarslysi á sunnudagsmorgun eru á batavegi, samkvæmt upplýsingum frá vakthafandi lækni á gjörgæslu. Önnur stúlknanna er komin úr öndunarvél. Ein stúlka lést í slysinu. Þrír af þeim fimm sem í bílnum voru notuðu ekki bílbelti. Talið er að bjarga hefði mátt fjörtíu mannslífum í umferðinni á Íslandi á síðust sex árum ef notuð hefðu verið bílbelti.

Einar Magnús Magnússon, hjá Umferðarstofu, segir því miður enn fámennan hóp fólks trúa því, að við vissar aðstæður, borgi sig ekki að vera með bílbelti eins og þegar ekið er um fjallvegi. Hann segir þarna um mikinn misskilning og vanþekkingu á eðli umferðarslysa að ræða.