Nylon í efsta sætið í Bretlandi

Nylon-flokkurinn hefur heldur betur fengið byr undir báða vængi en lagið Sweet Dreams er komið í efsta sætið á breska popp-danslistanum sem kynntur verður næstkomandi sunnudagskvöld. Þessu verða síðan gerð góð skil í tónlistartímaritinu Music Week, biblíu tónlistariðnaðarins í Bretlandi, sem kemur út á mánudaginn í næstu viku. Þetta eru frábærar fréttir enda eru stelpurnar og allt fólkið í kringum þær búnar að leggja mikið á sig, segir Einar Bárðarson, umboðsmaður sveitarinnar hér heima. Við vorum bara að fá þetta í hendurnar, bætir hann við.

Sweet Dreams er b-hliðin á smáskífunni Closer sem kemur út 23.október. Um er að ræða svokallaða double a-side eða tvöfalda a-hliðar smáskífu og er þetta velþekkt herbragð innan tónlistarheimsins. Hljómsveitin Wham! gerði slíkt hið sama á níunda áratugnum með jólalagið vinsæla Last Christmas sem var b-hlið Everything She Wants en fyrstir til að bregða á þetta ráð voru hins vegar Bítlarnir sem gáfu árið 1967 út tvöfalda a-smáskífu með Strawberry Fields og Penny Lane.

Að sögn Einars var þetta gert vegna þess að fólk var mjög hrifið af útgáfu stúlknanna af Sweet Dreams og ekki þótti ráðlegt að bíða með útgáfuna, auk þess sem lagið er hálfgert stílbrot við það sem stúlkurnar hafa verið gera. Laginu hefur verið dreift á alla helstu dansstaði í Bretlandi, við Miðjarðarhafið og á Ibiza, segir Einar, kampakátur með árangurinn.

Closer er nú komið í spilun á helstu sjónvarpsstöðum þannig að við erum með öll sverð á lofti, bætir hann við og lætur þess getið að stúlkurnar hafi verið í fríi í gær en ráðist var í gerð myndbands við lagið og eru það sömu aðilar og gerðu myndbandið við lagið Losing a Friend. Síðan er það bara Wembley í kvöld, segir Einar en þar treður sveitin upp með strákabandinu McFly.