Hlaupabretti og sundlaug fyrir hross og hunda

Helgi Leifur Sigmarsson tamningamaður opnar innan skamms þjálfunar- og endurhæfingarstöð fyrir hross og hunda í hesthúsahverfinu í Víðidal. Helgi Leifur ætlar að bjóða upp á nýjungar við þjálfun dýranna en meðal þess sem hann býður upp á er sundlaug og hlaupabretti, nokkurs konar hesta-spa en án leirbaðanna.

"Ég hef séð svona stöð erlendis og hef ég kynnst ýmsum veikum hestum og hundum á lífsleiðinni," segir Helgi Leifur spurður um hvernig hugmyndin að stöðinni hafi kviknað. Tamningamaðurinn segir sundlaugina og hlaupabrettið vera viðbót við þau þjálfunarkerfi sem hann hefur notast við síðustu ár. "Jóhann R. Skúlason, heimsmeistari í tölti, þjálfar hesta í sundlaug með góðum árangri og sömu sögu er að segja af Magnúsi Skúlasyni og konu hans, en þau unnu alla skeiðflokkana á síðasta heimsmeistaramóti í Svíþjóð."

Helgi Leifur, sem rekur stöðina ásamt konu sinni, Örnu Rúnarsdóttur, segir sundlaugina gera mikið gagn við þjálfun hesta. "Í sundinu þjálfum við hestana án þess að leggja of miklar byrðar á þá. Þetta er alveg sama æfing fyrir þá og okkur mannfólkið. Við getum farið í sund meidd á baki eða á fæti og finnum ekki fyrir eymslunum í vatninu."

Hlaupabrettið sem Helgi Leifur hefur til umráða er nánast alveg eins og þau sem notuð eru í líkamsræktarstöðvum víðs vegar um heim. "Það er bara stærra, sterkara og kraftmeira. Það kemst upp í 25 kílómetra hraða á klukkustund og það er hægt að láta hrossin hlaupa í tíu gráðu halla," segir Helgi Leifur.

Tamningamaðurinn vinnur nú að því að gera stöðina klára en hann býst við að opna hana innan skamms. "Við erum að klára að ganga frá tækjunum fyrir hreinsunarbúnað laugarinnar og svo opnum við eftir svona tvær til þrjár vikur," segir Helgi Leifur hestaþjálfari.