Máfurinn í Elliðaárdalnum

Leikfélagið Sýnir lætur ekki bugast af íslenskum umhleypingum og óstöðugu veðurfari heldur tjaldar því sem til er uppi í Elliðaárdal og frumsýnir Máfinn eftir Anton Tsjekhov í dag.

Leikstjórinn að þessu sinni er Guðjón Þorsteinn Pálmarsson sem er í vissum skilningi kominn á heimavöll á ný en hann steig sín fyrstu leikhússkref með hópnum á sínum tíma. "Fyrir tveimur árum leikstýrði ég líka Stútungasögu sem sett var upp í Heiðmörk en það var fyrsta leikstjórnarverkefnið mitt eftir að ég kom heim úr námi," útskýrir Guðjón.

Máfurinn er í miklu uppáhaldi hjá Guðjóni og hann kveðst lengi hafa rennt hýru auga til leikritsins. "Þetta verk er hálfgerð ráðgáta og þetta var gríðarleg leit að kjarnanum því leikritið talar aldrei til manns á bara á einu plani. Síðan eru allskyns klisjur sem hafa orðið til í kringum Tsjekhov," segir Guðjón og útskýrir að búið sé að skera burt samóvara og talsvert af tedrykkju.

"Aðalpersónan Konstantín hefur oft verið látin spila á fiðlu en við viljum ekki sjá það. Hann spilar á lúður núna."

Annars sér sérlegur blokkflautukvartett um tónlistina í sýningunni en honum stjórnar Snæbjörn Ragnarsson, Bibbi, en hann hefur meðal annars samið tónlist fyrir Hugleik, Leikfélag Kópavogs og Leikfélag Hafnarfjarðar við góðan orðstír. Um búninga sér Kristín Gísladóttir en æðri máttarvöld um aðra umgjörð og leikmynd.

Uppfærslan er nokkuð óforskömmuð að sögn leikstjórans. "Við höfum verið að leita að kómíkinni í verkinu og styttum það töluvert og erum alveg óhrædd við að nota ódýrari leiðir til þess að kalla fram bros," segir leikstjórinn sposkur. "Tsjekhov hefur ábyggilega margsnúið sér í gröfunni á meðan á æfingaferlinu stóð. Við erum samt ekkert að freta á verkið og reynum að bera virðingu fyrir þessum sterku innri átökum sem verða milli persónanna."

Guðjón útskýrir að í leikhópnum séu margir af reyndustu ófaglærðu leikurum landsins. "Það er yndislegt að vera upp í Elliðaárdal með þessum góða hópi en þetta er samt ekkert grín. Það eru mjög sterkir einstaklingar innan hópsins og maður verður að passa upp á að þau passi hvert upp á annað. Þetta eru allt saman stjörnur."

Frumsýnt verður í dag kl. 15 í stóra rjóðrinu í hólmanum milli ánna en farinn er göngustígurinn frá Rafveituheimilinu, yfir bogabrúna og er þá komið að rjóðrinu. Áhorfendur eru hvattir til þess að taka með sér púða eða teppi og gott er að taka ferðastól með ef fólk getur ekki setið á jörðinni. Búið er að skipuleggja að minnsta kosti þrjár sýningar til viðbótar en nánari upplýsingar má finna á heimasíðunni www.leiklist.is.