Léttgeggjuð mamma og ungir listamenn

Á Skólabraut 35 á Akranesi er hús sem hefur vakið mikla athygli bæjarbúa enda óvenjulegt í meira lagi. Appelsínugult með grænum gluggum og rauðu þaki.

Eigendur hússins eru hjónin Magna F. Birnir, forstöðumaður deildar gæðamála og innri endurskoðunar hjá Landspítalanum, og Þorkell Guðbrandsson, yfirlæknir á sjúkrahúsinu á Akranesi, en þau nýta húsið þegar vaktir Þorkels eru langar uppi á Skaga.

„Framkvæmdirnar hófust fyrir einu og hálfu ári en í fyrstu hélt fólk að við værum að mála það í tilefni írskra daga sem haldnir eru uppi á Skaga ár hvert,“ segir Magna. „Við höfum ekkert verið að leiðrétta það enda má fólk túlka þetta hvernig sem það vill,“ bætir hún við en til gamans má geta þess að barnabarn þeirra Mögnu og Þorkels, Þula Glóð, var valið „rauðhærðasti ungi Íslendingurinn“ á írskum dögum í fyrra. „Þetta er bara svona þegar tveir listamenn eru á heimilinu og mamman er léttgeggjuð,“ útskýrir Magna og hlær en verkefnið er unnið í nánu samstarfi við dætur þeirra tvær sem báðar eru í listnámi.

„Elsta dóttir okka, Jóhanna Helga, er í meistaranámí við Art institute of Chicago, og yngsta dóttirin, Birna Bryndís, stundar nám í grafískri hönnun við Listaháskóla Íslands,“ segir Magna en auk þess hefur þriðja dóttirin, Friðrika Björg, samið barnasögu um húsið. „Heimilisfaðirinn nýtur þess síðan að fylgjast með okkur enda er hann mun jarðbundnari heldur en við, ekki jafn „crazy“,“ segir Magna og hlær. Inni í húsinu er síðan flest allt í sixties-stíl og segir Magna að hugmyndin að því sé komin frá gamalli ljósakrónu sem var skilin eftir þegar þau hjónin keyptu húsið.

Fyrir nokkru komu vinir Birnu úr Listaháskólanum og „gröffuðu“ fallegar myndir utan á húsið í mexíkönskum stíl. Athæfið vakti enn meiri athygli á húsinu og í fyrstu héldu nokkrir að þarna væru einhverjir óprúttnir náungar að vinna skemmdarverk. „Aumingjans drengirnir þurftu að taka sér ansi góðan tíma í að sannfæra þá um að þeir væru listamenn en ekki glæpamenn,“ segir Magna og hlær en vildi ekki gefa upp nafn drengjanna. „Graffarar gefa aldrei upp nöfnin sín heldur vilja láta þekkjast af verkum sínum,“ bætir hún við.